Oanlis ‘stoarmbriedkearing’ Warkumerwaard úteinset

De Warkumerwaard by Warkum is in weardefol natuergebiet oan de Fryske Iselmarkust. Troch eroazje spielt hieltyd mear fan de kust fuort. Om de kust te fersterkjen, leit oannimmer Van der Meer, yn gearwurking mei It Fryske Gea, de kommende moannen in ‘stoarmbriedkearing’ oan. Dizze beskermingswâl oan de kust soarget derfoar dat it gebiet yn it briedseizoen net gau mear oerstreame kin. Ek komt der in tûke ferbining tusken it gebiet en de Iselmar. Sa kinne yn de maitiid tûzenen fûgels, lykas bûnte wilster, wytstirnsen en ek ferskate greidefûgels, wer feilich briede en fretten fine. En sa kin bûten de maitiid om de bûtenwaard dochs gewoan wer oerstreame.

Njonken de oanlis fan de ‘stoarmbriedkearing’ wurde der ek oare wurksumheden útfierd. Sa wurdt in stiennen daam opknapt sadat de kust net mear fuortspielt en de kustline stabiler wurdt. Mei it werombringen en opknappen fan slinken en sleatten wurdt de wetterhúshâlding yn it gebiet ferbettere. Dêrtroch kinne fisken it gebiet wer brûke om te ridzjen en yn op te groeien.

Germ van der Burg, distriktshaad It Fryske Gea: “Mei dizze maatregels soargje wy derfoar dat dit bysûndere natuergebiet behâlden bliuwt en noch oantrekliker wurdt foar fûgels én fisken. Dêrmei fersterkje wy de Fryske Iselmarkust en leverje wy in moaie bydrage oan de natuerwearde fan de Iselmar.”

Henk de Boer, wethâlder gemeente Súdwest-Fryslân: “It is belangryk om te witten dat dizze wurksumheden net allinnich fûgels en fisken helpe, mar ek bydrage oan it ferbetterjen fan de hiele natuer yn it gebiet. Troch dizze stappen te meitsjen wolle we de Warkumerwaard noch mear in bloeiend libbensgebiet foar natuer meitsje, passend by de bysûndere Iselmarkust fan Súdwest-Fryslân.”